﻿Zabur 7
PINTADUWA MINDAMO DO KOTIMBANGO

(Pemimpin)
! I korudu di Daud i linongoi sid TUHAN gima i Kus it ulun do Benyamin minanala di Daud.

(Jemaat)
O TUHAN i Kinoringan ku, sumunsud oku sid Dikau; sopulai oku om polobuso oku no antad sid sokoviai it ulun di magasu dohon.

(Pemimpin)
Kada no posimozo'o yoti di yadko mondou i manabpo om mangagazat dohon sid pomogunan dit iso ot ulun nga aso kapanapul dohon.

(Jemaat)
O TUHAN Kinoringan ku, ong kopipangagama oku dot ara'at, ong kisala iti palad ku,

(Pemimpin)
antawa ong minangaraat oku sid ulun di kumiandus dohon, antawa minongorugi dit ulun di suma'ap dohon dot aso pavaza'an,

(Jemaat)
ipagasu oku no di sangod ku do sampai atabpa'an di sangod ku, om iri ogi ipapatai oku om yopung oku sid avu!

(Pemimpin)
O TUHAN, ingkakat no do humungot, om saapo no i korongito dit ongosangod ku! Ingkakat no om tulungai oku no, sabap i kotimbango ot indomo'on Nu.

(Jemaat)
Umpugo no it ongobansa sid mintutuk Nu, om kuasao no yoti antad sid oogomon Nu do raja sid sorga. Hoturo no yoti antad sid oogomon Nu do Raja sid sorga;  ogom no sid oogomon Nu i sid savat;

(Pemimpin)
Ikau no dino o momisara di sokoviai i riniba. O TUHAN, tahakai oku no do kotimbango, tu yoku diti aso sala.

(Jemaat)
Pentorono no i kara'atan dit ulun tara'at, om tahakai no do su'ul it ulun dot abanal, tu Ikau no i Kinoringan dot otimbang, kahavol ko di ginavo om pongitungan dot ulun.

(Pemimpin)
I Kinoringan o mongolikup dohon; Yosido no i manapul dioti dit obinsuhut sid Kinoringan.

(Jemaat)
I Kinoringan o hakim dot otimbang, i soumul mongohukum dit ulun tara'at.

(Pemimpin)
Ong amu sumimban i kabahazano dioti, asaon di Kinoringan i sapadang Dau. Yosido mingat om mongunda di pana Dau.

(Jemaat)
Onuvon Dau it ongorapo Dau di kapatai, potonguson Dau i ramok i mikit-sikit.

(Pemimpin)
Imatai no i vaza dit ulun tara'at mongitung di kara'atan; mongumba yoti do kounangan om momomusing.

(Jemaat)
Pata'an yoti do sirangkap sid ulun vokon, topot yoti ogi kondiri o kosulung sino.

(Pemimpin)
Manjadi yoti ohukum di kara'atan dau kondiri, om asaadan di korongito dioti kondiri.

(Semua)
Monorimakasi oku sid Kinoringan tu otimbang Yosido, mindolongoi oku dot indazou sid TUHAN i banalko asavat.

